Dearbhú Cáilitheachta agus Oiriúnachta

Éilíonn an tAcht Uchtála go mbeadh Dearbhú Cáilitheachta agus Oiriúnachta ag tuismitheoir(í) uchtaíoch(a) ionchasach(a) sular féidir leo páiste a uchtáil. Is ionann Dearbhú Cáilitheachta agus Oiriúnachta go héifeachtach agus ceadúnas le dul chun cinn go huchtáil. Is é Údarás Uchtála na hÉireann an t-aon fhoras atá údaraithe chun Dearbhuithe Cáilitheachta agus Oiriúnachta a dheonú.

Chun Dearbhú Cáilitheachta agus Oiriúnachta a fháil ní mór go ndéanfaí cáilitheacht an tuismitheora/na dtuismitheoirí uchtaíocha ionchasacha a fhíorú agus go ndéanfaí measúnú ar a n-oiriúnacht. Tá na critéir i leith cáilitheachta agus oiriúnachta leagtha síos san Acht Uchtála 2010. Déanann Tusla – An Ghníomhaireacht um Leanaí & An Teaghlach agus forais chreidiúnaithe ar leith an measúnú ar thuismitheoir(í) ionchasach(a).

Tá na céimeanna chun iarratas a dhéanamh ar Dhearbhú Cáilitheachta agus Oiriúnachta agus an próiseas a leanann an tÚdarás Uchtála agus machnamh á dhéanamh aige ar an iarratas leagtha síos sa bhileog mhíniúcháin seo.

Tá na rialacha a bhaineann le hiarratas a dhéanamh ar Dhearbhú Cáilitheachta agus Oiriúnachta, ar é a dheonú agus é a chur i leataobh, leagtha síos sa bhileog mhíniúcháin seo.

Cuireadh Údarás Uchtála na hÉireann ar bun mar fhoras neamhspleách rialála ar 1 Samhain 2010 i ndiaidh achtú an Achta Uchtála 2010.

Is é misean an Údaráis Uchtála ná a chinntiú go sásaíonn na seirbhísí a bhaineann le h-uchtáil na caighdeáin is airde ar feadh phróiseas uile na huchtála. Tugtar tús áite i ngach cás do leas an pháiste.

Tacaíonn na rialacha seo leis an misean sin. Bainfimid úsáid as na rialacha seo ó 1 Eanáir 2018.

Ní léirmhíniú dleathach ar an bpróiseas uchtála atá sa doiciméad seo agus ní hionann é agus comhairle dlí. Is mar eolas amháin atá sé ann. Má bhíonn aon cheisteanna agat faoi uchtáil, cáilitheacht, oiriúnacht agus léirmhíniú téigh i dteagmháil, le do thoil, le dlíodóir le haghaidh comhairle dlí.

Cliceáil anseo don Doiciméad

Sreabhadh Phróiseas Uchtála

Síneadh le Dearbhú Cáilitheachta agus Oiriúnachta

Tá Dearbhú Cáilitheachta agus Oiriúnachta bailí ar feadh tréimhse 2 bhliain ón dáta a dheonaíonn an tÚdarás é. Ceadaíonn Alt 41 den Acht Uchtála 2010 don Údarás síneadh amháin de gan níos mó ná 12 mí a dheonú, faoi réir coinníollacha áirithe.

 Ba cheart duit scríobh chuig an Údarás sula dtéann do Dhearbhú Cáilitheachta agus Oiriúnachta bunaidh as feidhm ach gan é a bheith níos luaithe ná trí mhí roimh an dáta sin. Mura bhfuil athruithe ábhartha AR BITH ar do chúinsí, ba cheart duit Dearbhú Reachtúil a chomhlánú, mionn a ghlacadh, agus é a chur ar an bpost ag an aonad ábhartha san Údarás Uchtála.

Más amhlaidh GO BHFUIL athrú ábhartha tagtha ar do chúinsí ní mór go scríobhfá ag an Údarás ag tabhairt d’ Uimhir Tagartha. Is féidir an uimhir sin a fháil ar an Dearbhú Cáilitheachta agus Oiriúnachta bunaidh. Sa litir ba cheart go dtabharfá cur síos ar nádúr an athraithe nó na n-athraithe atá tarlaithe. D’fhéadfadh an tÚdarás measúnú atá tugtha cothrom le dáta a iarraidh ó d’oibrí sóisialta measúnaithe lena n-áirítear faomhadh ón gCoiste Uchtála Áitiúil (LAC). Níor cheart duit Dearbhú Reachtúil a chomhlánú sna cúinsí seo.

Sa chás go ndeonaítear síneadh ar do Dhearbhú Cáilitheachta agus Oiriúnachta beidh sé bailí ón dáta a théann an Dearbhú Cáilitheachta agus Oiriúnachta bunaidh as feidhm go dáta nach mbeidh níos mó ná 12 mí ina dhiaidh sin.

Is éard is ‘athrú ábhartha i gcúinsí’ ná aon athrú suntasach nó tábhachtach i do chúinsí ó deonaíodh an Dearbhú Cáilitheachta agus Oiriúnachta bunaidh duit. Cuimsíonn sé athruithe mar

• breith páiste;
• socrúchán páiste leat i socrú altranais;
• athrú áit chónaithe;
• athrú ar stádas fostaíochta;
• athrú ar stádas sláinte.

Ba cheart litreacha iarratais agus Dearbhuithe Reachtúla, nuair is iomchuí, a sheoladh ar an bPOST chuig an aonad ábhartha, i.e. an tAonad um Uchtálacha Náisiúnta nó an tAonad um Uchtálacha Idir Tíortha ag

Údarás Uchtála na hÉireann
Teach Shíol Bhroin
Droichead na Dothra
Baile Átha Cliath 4
D04 H6F6

Tá an fhreagracht ort féin a chinntiú go gcuirtear an t-iarratas ar shíneadh isteach ag an Údarás sula dtéann an Dearbhú bunaidh as feidhm. Ní féidir glacadh le haon iarratas a fhaightear tar éis don Dearbhú dul as feidhm. I gcásanna mar sin beidh ort iarratas nua ar Dhearbhú Cáilitheachta agus Oiriúnachta nua a dhéanamh le do ghníomhaireacht measúnaithe.

Dearbhú Reachtúil le nótaí comhlánaithe

Dearbhú Reachtúil d’iarratasóir aonair

Dearbhú Reachtúil do Lánúin