Iarraidh Ar Fhaisnéis Bhreithe A Dhéanamh
Más rud é:
- gur dhuine uchtaithe tú;
- gur dhuine tú a bhí faoi chúram altramais (ar a dtugtar duine a cuireadh amach ar lóistín nó ar altramas, uaireanta);
- gur dhuine tú a chónaigh i dTeaghlach Contae, agus tú i do leanbh;
- gur dhuine tú a chónaigh in Áras Máithreacha is Leanaí, agus tú i do leanbh;
- gur dhuine tú ar cláraíodh do bhreith go mídhleathach, nó má tá tú in amhras gur cláraíodh do bhreith go mídhleathach;
- gur leanbh tú de dhuine de na cineálacha daoine thuasluaite, atá éagtha anois;
agus más mian leat iarratas a dhéanamh faoi Acht um Fhaisnéis agus Rianú Breithe, 2022 ar chóipeanna de thaifid fút ó do bhreith go dtí 18 mbliana d’aois, atá á gcoinneáil ag an Údarás Uchtála, líon isteach foirm ghréasáin Údarás Uchtála na hÉireann thíos.
Tabhair do d’aire gur sheirbhís saor in aisce í seo do dhaoine a chónaíonn in Éirinn nó in áit ar bith eile ar domhan.
Ní gá aturnae nó gairmí dlí eile a úsáid chun iarratas a dhéanamh ar aon cheann de na seirbhísí faoin Acht um Fhaisnéis agus Rianú Breithe, 2022.
Beidh an fhaisnéis atá ar fáil difriúil ó dhuine go duine, ag brath ar chineál, cáilíocht agus líon na dtaifead atá á gcoinneáil ag an Údarás Uchtála.
I gcás roinnt daoine, seans go gciallóidh sé sin go mbeidh taifid mhionsonraithe ar fáil, ach seans nach mbeidh ach beagán faisnéise, nó faisnéis ar bith ar fáil i gcás daoine eile, ar an drochuair.
Cuimhnigh iarratas a dhéanamh chuig Tusla – An Ghníomhaireacht um Leanaí agus an Teaghlach, freisin, mar d’fhéadfadh sé go bhfuil faisnéis ábhartha acu faoi bhreith, tús saoil agus cúram daoine chomh maith.
Treoir céim ar chéim maidir le Iarratas Ar Fhaisnéis Bhreithe A Fháil Ón Údarás Uchtála
-
1 D’aitheantas fótagrafach a ullmhú
Déanfar d’aitheantas fótagrafach (ID) a sheiceáil chun do chéannacht a fhíorú.
Ní mór dó bheith ina chineál aitheantais bailí nach bhfuil imithe in éag.
Glactar leis na cineálacha aitheantais fótagrafaigh seo a leanas:
- Pas
- Cárta seirbhísí poiblí
- Aoischárta ón nGarda Síochána
- Ceadúnas tiomána (lena n-áirítear ceadúnas sealadach)
Ní gá cóipeanna de na doiciméid aitheantais sin a dheimhniú.
Ar do chomhartha aitheantais a fhíorú, déanfar é a léirscriosadh agus ní choinneoidh an tÚdarás Uchtála é.
-
2 Doiciméid thacaíochta a ullmhú (más infheidhme)
- Litir Thoilithe
Má tá duine éigin ag cuidiú leat chun an t-iarratas a dhéanamh, ceanglaítear ort litir thoilithe a chur ar aghaidh leis an iarratas, agus í sínithe agus dátaithe, ina n-ainmnítear an duine atá ag cuidiú leat agus ina dtugtar cead dóibh gníomhú thar do cheann.
Is gá aitheantas fótagrafach bailí, nach bhfuil imithe in éag, don duine atá ag cuidiú leis an iarratas, a chur ar aghaidh leis an iarratas freisin.
- Deimhniú Báis agus Cruthúnas ar Ghaol
Más leanbh duine iomchuí éagtha tú agus má tá iarratas á dhéanamh agat ar fhaisnéis fúthu, beidh ort cóip dá ndeimhniú báis nó fógra báis a chur ar aghaidh leis an iarratas agus cruthúnas ar an ngaol atá agat leo, mar shampla, cóip de do theastas breithe.
- Litir Thoilithe
-
3 Foirm iarratais a líonadh isteach agus a chur ar aghaidh
Líon isteach an fhoirm iarratais ar líne atá le fáil thíos.
Tabhair an oiread faisnéise agus is féidir leat san iarratas, chun cabhrú le foireann Údarás Uchtála na hÉireann taifid ábhartha a aimsiú.
Cuimhnigh na nithe seo a chur ar aghaidh leis an iarratas:
- cóip d’aitheantas fótagrafach atá bailí agus nach bhfuil imithe in éag; agus
- aon doiciméid thacaíochta eile a theastaíonn, más infheidhme (féach pointe 2 thuas)
Ar deireadh, sínigh an iarratas go digiteach agus cuir dáta air.
-
4 Admháil a fháil
Seolfar admháil i scríbhinn agus uimhir thagartha uathúil chugat laistigh de 5 lá oibre ón dáta a bhfuarthas an t-iarratas.
-
5 An Clár um Shainroghanna Teagmhála a sheiceáil
Más duine uchtaithe tú, déanfar an Clár um Shainroghanna Teagmhála a sheiceáil lena fháil amach ar chláraigh do mháthair bhreithe, d’athair breithe, nó an bheirt acu, agus ar roghnaigh siad ‘gan teagmháil’ a dhéanamh.
Má tá taifead ar “gan teagmháil” a bheith roghnaithe, iarrfar ort freastal ar “sheisiún faisnéise”.
Is cumarsáid idir tú féin agus duine ón Údarás Uchtála atá i seisiún faisnéise.Is féidir glaoch gutháin gearr, físghlao, nó cruinniú duine le duine a bheith i gceist leis an gcumarsáid sin.
-
6 Freastal ar an seisiún faisnéise (más infheidhme)
Le linn an tseisiúin faisnéise (más infheidhme), cuirfear in iúl duit go bhfuil tú i dteideal faisnéis faoi do bhreith a fháil, go bhfuil an ceart chun príobháideachais ag do thuismitheoirí breithe agus cé acu a roghnaigh nó nár roghnaigh siad gan teagmháil a dhéanamh.
Nuair a bheidh an seisiún déanta, cuirfear d’iarratas ar aghaidh lena phróiseáil, agus scaoilfear duit cóipeanna den fhaisnéis ábhartha go léir fút ó do bhreith go dtí 18 mbliana d’aois.
Déanfar an seisiún faisnéise a thaifeadadh ar do chomhad.
NB Cé acu a iarrtar ort páirt a ghlacadh i seisiún faisnéise nó nach n-iarrtar, scaoilfear duit cóipeanna de na taifid go léir a bhaineann leat, ó do bhreith go dtí 18 mbliana d’aois.
-
7 An t-iarratas a phróiseáil
Déanfar cuardach ar na nithe seo a leanas go léir:
- Comhaid de chásanna baile agus idir tíortha a chuir an tÚdarás Uchtála i dtoll a chéile;
- Comhaid stairiúla de chásanna chumainn uchtála atá i seilbh an Údaráis
- Cláir ó Theaghlach Contae agus ó Árais Mháithreacha is Leanaí atá i seilbh an Údaráis cheana féin.
Déanfar cuardaigh mhionsonraithe de na cineálacha taifead go léir agus de na foinsí faisnéise go léir lena chinntiú go scaoilfear cóipeanna den fhaisnéis ábhartha go léir a d’fhéadfadh a bheith ann faoi bhreith agus tús saoil.
Déanfar cóipeanna de theastais bhreithe, faisnéis faoi bhreith, faisnéis faoi thús saoil, faisnéis faoi chúram agus faisnéis liachta a bhaineann leis an duine iomchuí a scaoileadh i bhfoirm neamhfholaithe.
Déanfar formhór na n-iarratas a phróiseáil laistigh de mhí amháin ó iarratas bailí a fháil, ach i gcásanna casta d’fhéadfadh tréimhse chomh fada le trí mhí a bheith i gceist chun próiseáil an iarratais a thabhairt chun críche. Cuirfear an t-iarratasóir ar an eolas má tá moill níos mó ná mí i gceist.
Beidh an fhaisnéis atá ar fáil difriúil ó dhuine go duine, ag brath ar chineál, cáilíocht agus líon na dtaifead atá á gcoinneáil ag an Údarás Uchtála.
I gcás roinnt daoine, seans go gciallóidh sé sin go mbeidh taifid mhionsonraithe ar fáil, ach seans nach mbeidh ach beagán faisnéise, nó faisnéis ar bith ar fáil i gcás daoine eile, ar an drochuair.
-
8 Athbhreithniú a iarraidh (más gá)
Nuair a bheidh d’iarratas próiseáilte agus nuair a bheidh cumarsáid agus cóipeanna de dhoiciméid (má tá siad ar fáil) faighte agat ón Údarás Uchtála, is féidir leat a iarraidh go ndéanfadh ball foirne eile den Údarás Uchtála athbhreithniú ar d’iarratas.
Duine eile a dhéanfaidh an tAthbhreithniú, seachas an duine a láimhseáil d’iarratas ar dtús.
Iarratas tríd an bpost
Má tá sé níos éasca duit foirm chruachóipe a líonadh isteach, is féidir leat teagmháil a dhéanamh leis an Údarás Uchtála ar 01 2309 300 (rogha 1) agus iarraidh orainn cóip den Fhoirm Iarratas ar Fhaisnéis BITA (2022) a sheoladh chugat tríd an bpost.