Gearáin

Leis an nós imeachta gearán seo, tugtar deis do dhuine ar bith a fhaigheann seirbhísí uchtála gearán a dhéanamh faoi ghníomhartha nó mainneachtainí Údarás Uchtála na hÉireann. Cuimsíonn an córas gearán comhlachtaí creidiúnaithe cláraithe a sholáthraíonn seirbhísí éagsúla a bhaineann le huchtáil chomh maith.

Cad is féidir gearán a dhéanamh faoi?

Is féidir gearán a dhéanamh faoi aon ghníomh a dhéanann an tÚdarás nó comhlacht creidiúnaithe:

a dhealraítear nach cleachtas riaracháin cóir nó iontaofa é, i do thuairim, agus
a bhfuil éifeacht dhiúltach aige ortsa nó ar dhuine a bhfuil gearán á dhéanamh agat thar a cheann nó thar a ceann.

Cad is cleachtas riaracháin cóir nó iontaofa ann?

Ciallaíonn cleachtas riaracháin an bealach a dhéantar cinntí agus a oibríonn seirbhísí. Faoin gcóras gearán, ní mheastar cleachtas riaracháin a bheith cóir nó iontaofa sa chás:

go ndéantar é gan údarás cuí;
go ndéantar é ar fhorais neamhábhartha;
go ndearnadh é mar thoradh ar fhaillí nó neamh-aire;
go bhfuil sé bunaithe ar fhaisnéis mhícheart nó neamhiomlán;
go bhfuil sé idirdhealaitheach go míchuí;
go bhfuil sé bunaithe ar chleachtas riaracháin neamh-inmhianaithe; nó
go bhfuil sé, in aon tslí eile, contrártha do riaradh cóir nó fónta.

Cé hiad na daoine ar féidir leo gearán a dhéanamh?

Is féidir le haon duine dá ndéantar difear gearán a dhéanamh. Murar féidir leat gearán a dhéanamh thar do cheann féin mar gheall ar d’aois, breoiteacht nó míchumas, is féidir leat duine éigin eile a ainmniú chun an gearán a dhéanamh thar do cheann, mar shampla:

neasghaol;
aon duine a cheapann an dlí nó na cúirteanna chun aire a thabhairt do do ghnóthaí;
ionadaí dlíthiúil; nó
aon duine eile, le toiliú uaitse.

Cad iad na gearáin nach gcuimsítear iad?

Ábhar atá nó a bhí ina ábhar d'imeachtaí dlíthiúla os comhair cúirte nó binse;
Ábhar a bhaineann le cinneadh an Údaráis agus a fheidhmeanna reachtúla á gcomhlíonadh aige agus sin amháin (mar shampla, iarratas ar ordú uchtála nó iarratas ar iontráil i gClár na nUchtálacha Idir Tíortha);
Ábhar a bhaineann le fostaí an Údaráis a earcú nó a cheapadh tríd an tSeirbhís um Cheapacháin Phoiblí, nó le téarmaí agus coinníollacha an fhostaí sin;
Ábhar a d’fhéadfadh dochar a dhéanamh d’imscrúdú arna dhéanamh ag An Garda Síochana;
Ábhar a tugadh os comhair aon nós imeachta gearán reachtúil eile.

An tslí le gearán a dhéanamh

Más mian leat gearán a dhéanamh faoin Údarás, ba cheart duit iarracht a dhéanamh an fhadhb a réiteach go háitiúil ar dtús. Ciallaíonn sé sin an gearán a chur faoi bhráid an duine atá i gceannas ar an tseirbhís, mar shampla bainisteoir an Aonaid san Údarás atá i gceist nó an príomh-oibrí sóisialach (má bhaineann an gearán le hoibrí sóisialach de chuid an Údaráis). Tá deich n-aonad riaracháin ag an Údarás. Is iad sin,

Aonad na dTaifead - records@aai.gov.ie
An tAonad Uchtála Baile - domestic@aai.gov.ie
An tAonad Uchtála Idir Tíortha - intercountry@aai.gov.ie
An Fhoireann Oibre Sóisialta - sw@aai.gov.ie
Seirbhísí Corparáideacha - corporate@aai.gov.ie
An tAonad Cosanta Sonraí - dataprotection@aai.gov.ie
Acmhainní Daonna - hr@aai.gov.ie
Taighde - AAI_Research@aai.gov.ie
Aonad na gCartlann - archives@aai.gov.ie
An tAonad Saorála Faisnéise - foi@aai.gov.ie

Beifear in ann an t-imscrúdú ar do ghearán a dhéanamh níos tapúla má chuireann tú na mionsonraí seo a leanas ar fáil:

D’ainm, do sheoladh agus do sheoladh ríomhphoist
Cad go díreach a raibh tú míshásta faoi
Ainm an oifigigh nó na rannóige ar phléigh tú leo
Uimhir ghutháin a úsáideann tú i rith an lae.

Beidh ort do ghearán a dhéanamh i scríbhinn agus an oiread mionsonraí agus is féidir a thabhairt. Tabharfar admháil i scríbhinn go bhfuarthas gearáin laistigh de chúig lá oibre agus déanfaidh oifigeach gearán an gearán a imscrúdú laistigh de 30 lá. Má tá níos mó ná 30 lá i gceist leis an imscrúdú a dhéanamh, coinneoidh an t-oifigeach gearán ar an eolas tú faoin dul chun cinn ar do ghearán gach 20 lá oibre.

Tar éis an imscrúdaithe, gheobhaidh tú freagra i scríbhinn ar do ghearán agus cuirfear in iúl duit go bhfuil sé de cheart agat athbhreithniú inmheánach ar mholadh/moltaí an oifigigh ghearán a iarraidh. Cuirfear in iúl duit freisin go bhfuil sé de cheart agat gearán a dhéanamh chuig an Ombudsman nó chuig an Ombudsman do Leanaí.

Caithfear le gach gearán go pras, go cóir, go neamhchlaonta agus go rúnda;
Coinneoimid taifid de ghearáin ar leithligh ó thaifid eile
Cinnteoimid nach n-úsáidfear aon ghearán a rinne tú de mheon macánta le d'aimhleas amach anseo
Déanfaimid gach iarracht foghlaim ó bhotúin lena chinntiú nach ndéanfar na hearráidí sin arís.